राम मंदिर हे केवळ एक धार्मिक स्थळ नाही; ते कोट्यवधी हिंदूंच्या श्रद्धेचे प्रतीक आहे. त्यामुळे मंदिराच्या निधी, चढावे किंवा आर्थिक व्यवहारांबाबत कोणतीही शंका निर्माण झाली तर तिचे तातडीने आणि पारदर्शकपणे निरसन होणे आवश्यक आहे.
अलीकडे राम मंदिरातील चढाव्याच्या कथित चोरी आणि आर्थिक गैरव्यवहारासंदर्भात आरोप झाले. या आरोपांची सत्यता काय आहे, याचा अंतिम निर्णय चौकशी आणि पुराव्यांवरच अवलंबून असेल. मात्र या प्रकरणात सर्वाधिक प्रश्नचिन्ह निर्माण झाले ते माध्यमांच्या भूमिकेवर. अनेक राष्ट्रीय माध्यमांनी या विषयाकडे अत्यंत सावधपणे पाहिले, तर काहींनी त्याकडे जवळपास दुर्लक्षच केले. त्यामुळे “माध्यमे सत्य लपवत आहेत का?” हा प्रश्न जनतेच्या मनात निर्माण होणे स्वाभाविक आहे.
: मनीष चंद्रशेखर वाघ
लोकशाहीत माध्यमांचे काम कोणत्याही संस्थेचे संरक्षण करणे नसून सत्याचा शोध घेणे आहे. मंदिर असो, मशिद असो, चर्च असो किंवा सरकार—सार्वजनिक निधी आणि जनविश्वासाशी संबंधित प्रत्येक प्रश्नाची समान निकषांवर चौकशी झाली पाहिजे. श्रद्धा महत्त्वाची असली तरी पारदर्शकता त्याहून महत्त्वाची आहे. कारण श्रद्धेचा पाया विश्वासावर उभा असतो आणि विश्वासाचा पाया सत्यावर.
माध्यमांनी आरोपांचे अंध समर्थनही करू नये आणि अंध खंडनही करू नये. त्यांनी तथ्ये समोर आणावीत, संबंधित पक्षांना प्रश्न विचारावेत आणि जनतेला वस्तुस्थिती कळू द्यावी. जर आरोप खोटे असतील तर तेही स्पष्ट व्हावे; आणि जर काही गैरप्रकार झाला असेल तर तोही उघड व्हावा.
सत्य दडपण्याने नव्हे, तर सत्य स्वीकारण्याने श्रद्धा अधिक मजबूत होते. राम मंदिराची प्रतिष्ठा त्याच्या व्यवस्थापनातील पारदर्शकतेमुळे अधिक उंचावेल.