टोइंग व्हॅनविरोधात अजय जेया यांचे उद्यापासून ठाण्यात जनजागृती अभियान

ठाणे  : ठाणे शहरातील सामाजिकक्षेत्रात कार्यरत असलेले अजय जेया हे, सुमारे वर्षभरापासून टोइंगच्या माध्यमातून होणारा गैरप्रकार, लोकांसमोर मांडत आलेले आहेत. यासंदर्भात अनेक पीडित वाहनधारक, त्यांचा होणारा मानसिक छळ, कारवाईच्या नावाखाली त्यांच्याकडून विनाकारण उकळले गेलेले पैसे, इत्यादि तक्रारी घेऊन त्यांच्याशी संपर्क साधत असतात. एकीकडे टोइंगच्या माध्यमातून मोठ्याप्रमाणात गैरप्रकार आणि गैरव्यवहार बाढलेला असताना, दुसरीकडे मात्र, सर्वसामान्य नागरिकांना तसेच, वाहनधारकांना टोइंग व्हॅनच्या साचेबद्ध (S.O.P) कायद्याबद्दल काहीही माहिती नसते. याप्रकरणी किंवा संबंधित गैरप्रकाराविरोधात तक्रार कशी करायची आणि कुठे करायची? यासंदर्भात वाहनधारकांना कोणतीही माहिती नसते आणि म्हणूनच, अशा पीडित वाहनधारकांना व सर्वसामान्य नागरिकांना सहकार्य करण्याच्या उद्देशाने, दि. २८ जून ते ०५ जुलै-२०२४ रोजीपर्यंत, ठाणे शहरातील महत्त्वाच्या ठिकाणी अजय जेया आणि त्यांचे सहकारी जनजागृती करणार आहेत. या जनजागृती उपक्रमाच्या माध्यमातून, जी काही कायदेशीर प्रक्रिया आहे, त्याबद्दल माहिती देण्यात येणार आहे. त्याचप्रमाणे, ज्या पीडित वाहनधारकांची जी काही तक्रार असेल, त्याची व्यवस्थित नोंद घेऊन, ती योग्य त्या विभागाकडे सादर करण्यात येईल. आवश्यकता भासल्यास, सदर तक्रारी थेट न्यायालयात सादर करणार असल्याची माहिती समाजसेवक अजय जेया यांनी यावेळी पत्रकारांशी बोलताना दिली.

*दरम्यान,* या जनजागृती अभियानाच्या माध्यमातून, जिथे टोइंगच्या गाड्या उचलून नेल्या जातात, त्याठिकाणी दोन सामाजिक कार्यकर्ते उपस्थित राहून, त्यांच्याकडून वाहनधारक आणि सर्वसामान्य नागरिकांना कायदेशीर मार्गाबद्दल माहिती देण्यात येईल. यावेळी पत्रकारांशी बोलताना अजय जेया पुढे म्हणाले की, या जनजागृती अभियानाची माहिती प्राप्त होण्यासाठी, रिक्षावर ध्वनीप्रक्षेपक लावून, सदर रिक्षा ठाणे शहरात फिरविण्यात येईल. यासाठी १) कोपरी वाहतूक शाखेच्या शेजारी, ठाणे. (पूर्व), २) ठाणे उपायुक्त वाहतूक शाखा, सर्व्हिस रोड, तीन हात नाका, ३) नितीन कंपनीच्या उड्‌डाणपुलाखाली, ४) माजिवडा उड्‌डाणपुलाखाली, ५) वाघबीळ नाका उड्डाणपुलाखाली, ६) ठाणे नगर एसीपी कार्यालयासमोर, ७) राबोडी वाहतूक पोलीस चौकीजवळ, या ठिकाणी माझे सहकारी उपस्थित राहून वाहनधारक आणि सर्वसामान्य नागरिकांना टोइंग व्हॅनच्या माध्यमातून होणारा गैरप्रकार आणि पार्किंग समस्यांसंदर्भात, योग्य ते मार्गदर्शन करतील, अशी माहिती समाजसेवक अजय जेया यांनी शेवटी पत्रकारांशी बोलताना दिली.