ठाणे : रविवार रात्रीपासून पावसाची संततधार सुरू असून शहरातील सखल भागात पाणी साचणाऱ्या ठिकाणांचा आढावा खासदार नरेश म्हस्के यांनी घेतला. शहरातील वंदना टॉकीज परिसर, जांभळी नाका येथील पेढ्या मारुती मंदिर परिसर या सखल भागात प्रशासनाने पंपची व्यवस्था केली असल्यामुळे पाणी साचले नसल्याचे आपत्कालीन विभागाकडून सांगण्यात आले. तसेच आपत्कालीन परिस्थितीत वेळेवर यंत्रणा पोहचवून आवश्यक उपाययोजना करण्यासाठी प्रभाग समिती निहाय पथके तैनात करण्यात आली असल्याचेही यावेळी सांगण्यात आले.
पावसाळ्यादरम्यान भरतीच्या वेळा पाहून ज्या दिवशी भरती असेल त्या दिवशी सर्व यंत्रणांनी सज्ज रहावे, शहरात कुठेही झाड पडल्याची घटना घडल्यास तातडीने पडलेले झाड उचलले जाईल या दृष्टीने कार्यवाही करणे तसेच आपत्कालीन विभागात येणाऱ्या प्रत्येक तक्रारीचे निवारण होईल या दृष्टीने कामकाज करण्याच्या सूचना यावेळी खासदार नरेश म्हस्के यांनी यावेळी दिल्या. तसेच यासाठी आवश्यक मनुष्यबळ पुरविण्याच्या सूचना देखील वरिष्ठ अधिकाऱ्यांना दिल्या.
पाहणी दौऱ्या दरम्यान झालेल्या बैठकीत खासदार नरेश म्हस्के यांनी परिवहन सेवेचा देखील आढावा घेतला. परिवहनच्या ताफ्यात नव्याने खरेदी करण्यात येणाऱ्या बसेसमध्ये मिनी बसची संख्या वाढवावी, जेणेकरुन शहरातील अंतर्गत भागात मिनी बसच्या माध्यमातून नागरिकांना सेवा देता येईल, याचा फायदा नागरिकांना होईलच परंतु परिवहनच्या उत्पन्नात देखील भर पडेल असे त्यांनी नमूद केले. शहरात परिवहनची संख्या वाढवावी अशी मागणी नागरिकांकडून होत असून त्या दृष्टीने मिनी बसची संख्या वाढविण्याच्या सूचना त्यांनी यावेळी दिल्या.
संततधार पावसामुळे आज रेल्वे सेवेवर परिणाम झाला होता. ठाणे रेल्वे स्थानकात प्रवाशांची सकाळी गर्दी झाली होती. यावर मार्ग काढण्यासाठी खासदार नरेश म्हस्के यांनी परिवहन व्यवस्थापक श्री.बेहेरे यांना निर्देश देऊन ठाणे रेल्वे स्थानकावरून मुलुंड आणि इतर विविध ठिकाणी अनेक बसेस सोडल्या.
यावेळी खासदार नरेश म्हस्के यांच्यासमवेत शिवसेना ठाणे महापालिका क्षेत्र संघटक अशोक वैती, कोपरी पाचपाखाडी शिवसेना शहरप्रमुख राम रेपाळे, परिवहन सभापती विलास जोशी, माजी नगरसेवक संजय भोईर, युवा सेनेचे नितीन लांडगे, ऋषिकेश माने, जितेश गुप्ता उपस्थित होते. तर प्रशासनाच्यावतीने अतिरिक्त आयुक्त 1 संदीप माळवी, अतिरिक्त आयुक्त 2 प्रशांत रोडे, उपायुक्त जी.जी. गोदेपुरे, सचिन पवार, आपत्कालीन व्यवस्थापन अधिकारी वाय.एम. तडवी आदी उपस्थित होते.
